છે મજા
જો દુઃખો ખાળી શકો તો છે મજા,
જાત સંભાળી શકો તો છે મજા.
હોય સારા ફૂલ ઊંચી ડાળ પર,
ડાળ એ વાળી શકો તો છે મજા.
છે દુઃખોનું એક કારણ જે ઈચ્છા,
એ ઇચ્છા બાળી શકો તો છે મજા.
દુઃખ પછી સુખના દિવસ પણ આવશે,
બે દિવસ ટાળી શકો તો છે મજા.
રાત પૂનમની ચમકતી હોય છે,
વદ તમે ગાળી શકો તો છે મજા.
ના ગણો, સંબંધ છૂટ્યા કેટલા?
એક બે પાળી શકો તો છે મજા.
આપશે એની દવા પણ જિંદગી,
ઘાવ પંપાળી શકો તો છે મજા.
@ વિકી ત્રિવેદી 'ઉપેક્ષિત'
#kavyotsav