વાંચવામાં આવ્યું કે ડાબોડી લોકો ખૂબ હોંશિયાર હોય છે. જમણે હાથે કામ કરતાં વધારે ચડિયાતા. ભાઈ વહેમની પણ કોઈ હદ હોય કે નહીં? હવે આઈન્સ્ટાઇન અને ન્યૂટન ડાબોડી હતા, એટલે શું બધા ડાબોડી હોંશિયાર થવાના?
મને ડાબા કે જમણા હાથ વડે કામ કરનાર તરફ કોઈ પક્ષપાત નથી. હાથ, હાથનું કામ કરે. તેને અને મગજને કોઈ સીધો સંબંધ ખરો? હા, ડાબુ મગજ, જમણી તરફના શરીરનું સંચાલન કરે છે. જમણું મગજ ડાબી તરફના શરીરનું. શાળાના અભ્યાસ દરમિયાન આપણે સહુ ભણ્યા હતા ..
એક મજાનો પ્રસંગ અમારા કુટુંબમાં હમેશા બનતો. બે ભાઈઓ બહાર જમવા જઈએ ત્યારે સાથે જ બેસે. મોટો ડાબોડી અને નાનો જમણા હાથેથી બધું કામ કરે. ખુરશી પર હમેશા વિચારીને બેસે, નહીં તો બન્નેના હાથ ભટકાય અને પછી ભાઈઓની થાય મારામારી.
‘તેં મને કોણી મારી’.
‘તું અંદર રાખને’.
‘તને ખબર નથી હું ડાબા હાથે ખાઉં છું’?
‘તો તું બહાર હાથ આવે તેમ કેમ નથી બેસતો’?
ધીરજથી હું કહું,’ ચાલો બંને જણા હાથ મિલાવો અને જગ્યા બદલો’.
વાતનું વતેસર થાય તે પહેલા બન્ને ને ઠંડા પાડી દઈએ, એટલે મામલો બિચકે નહી
મારી મમ્મી નાના હતા ત્યારે જમણા હાથ પર ભાર મૂકતી. પશ્ચિમના સંડાસ તો આજે આવ્યા. યાદ છે ને આપણા જૂના અને જાણીતા સંડાસ.
ડાબા હાથે કામ કરનાર મારા દીકરાની બુદ્ધિ સતેજ છે કે નહીં તે જાણવા કરતા મારે મારી બુદ્ધિ સતેજ અને તીક્ષ્ણ રાખવી પડે ! બન્ને બાળકો માટે કંઈ પણ ખરીદવા જાઉં તે વખતે સદા યાદ રાખવાનું મોટાને માટે ડાબા હાથે વપરાય તેવી વસ્તુ લેવી. નહીં તો બદલવા પાછો ધક્કો ખાવો પડે.
બેઝબોલ રમતી વખતે એને માટે ‘ગ્લવ’ જમણા હાથનો લેવાનો. એ ડાબા હાથે બોલ ફેંકે અને જમણા હાથે પકડે.
ડાબા હાથે લખે , ડાબા હાથે જમે. જમવાની તેને હજાર વાર ના પાડી પણ માને નહીં. હવે તેનો પણ શું વાંક કાઢવો. એ ‘ડાબોડી ‘ છે.
મને એમ લાગે છે તે ડાબોડી હશે કારણ તેનું જમણું મગજ જરા વધારે પડતું સતેજ હશે. આ અનુમાન છે. સાચું હોઈ શકે તેની કોઈ બાંહેધરી હું આપતી નથી ! એક વસ્તુ મેં ખાસ નોંધી છે. આપણા ગુજરાતીઓનું સહુથી વધુ મનગમતું ફરસાણ કયું ? વિચારો, જવાબ ખૂબ સરળ છે.
‘ભજીયા અને બટાકા વડા’.
હવે આ કહેવા પાછળનો મુદ્દો ખૂબ રમુજી છે. જે ડાબોડી હોય ભજીયા જમણા હાથે મૂકી શકે. તળાઈ રહે એટલે કાઢવા માટે ડાબે હાથે ઝારો પકડે .. સમજ્યા કે વિગત બતાવું ! ભજીયા મુકતા હાથ ખરડાય પણ ડાબે હાથે કાઢે એટલે તેમનો ઝારો ક્યારે ગંદો નો થાય ! આ તો થઈ રસોડાની રાણીની વાત. પેલા રાજાને કેમ વિસરાય ?
મારા પતિદેવ ખુદ ડાબોડી હતા. હું જે પણ કંઈ કહું તો , અરીસામાં બતાવવું પડે. મારી સાડીમાં પીન નાખવાની, હિમાલય ચડવા જેટલું કપરું લાગે. એના માથામાં તેલ ઘસી દઉં તે ખૂબ ગમે . પાછા કહે ડાબે હાથે ઘસ તો એ બાજુનું મગજ પણ ઠંડુ થાય.
હું કહેતી, ‘હું જમણે હાથે બન્ને બાજુ સરસ મસાજ કરી દઉં છું’ પણ તેઓ માને જ નહીં !
મારી સાથે ભણતી સુલુ જ્યારે પરણવા બેઠી ત્યારે હસ્તમેળાપ વખતે ડાબો હાથ આગળ કર્યો. સુકેતુ મૂછમાં મલકાયો. ‘અરે પગલી લગ્ન વખતે તો જમણો હાથ મારા હાથમાં આપ.’ સુકેતુ બરાબર જાણતો હતો સુલુ પ્રવીણ હતી. તો વારી ગયો હતો. ઘણીવાર વિચાર આવતો આટલી બધી આવડત તેમનામાં કેવી રીતે ઠાંસી ઠાંસીને ભરી છે. સુલુ હસી પડી , ડાબો હાથ પાછો ખેંચ્યો અને જમણો હાથ, હાથમાં સરકાવ્યો. ગોર મહારાજ જ્યારે તેના પર ઉપરણો વીંટી રહ્યા હતા ત્યારે બે હાથ, તેના મિલાપ દ્વારા ઉદભવેલું સ્પંદન, તેનું મુખ રાતુચોળ થઈ ગયું હતું.
જો કે ઘણી વ્યક્તિઓ એવી હોય છે બન્ને હાથે એક સરખું કામ કરી શકે. પણ એવું જવલ્લે જોવા મળે.
ડાબા હાથમાં ખંજવાળ આવે તો માનવામાં આવે છે કે ,’લક્ષ્મીની મહેરબાની વરસે’. જમણા હાથમાં આવે તો કેમ નહીં ? મારા મત પ્રમાણે ડાબોડીઓને મહત્વતા વધારવા માટે આપણે ગુજરાતીઓએ એવું અર્થઘટન કર્યું છે.
પેલી રેશ્માને જોવા રાહુલ આવ્યો ત્યારે ખૂબ ગમ્મત થઈ હતી. રેશ્મા અને રાહુલ કોલેજમાં સાથે ભણતા હતા. રાહુલની મમ્મીને રેશ્મા ખૂબ ગમી ગઈ હતી. મળતાવડી પણ એવી કે વાત ન પૂછો. રેશ્માના ઘરમાં પણ દાદા અને દાદી હતા. તેને સંયુક્ત પરિવાર ગમતો હતો. હવે ૨૧મી સદીમાં આવી વિચારધારા ધરાવતી વ્યક્તિ દીવો લઈને શોધવા જઈએ તો પણ ન મળે.
રેશ્માને રાહુલ ખૂબ સારી રીતે ઓળખતો હતો. રાહુલના મમ્મી જાણતા હતા. પણ રેશ્માને ત્યાં કોઈને ખબર ન હતી. રેશ્માને ડર હતો કે જો મમ્મી અને પપ્પા જાણે કે રાહુલ બ્રાહ્મણ નથી અને જૈન છે તો ?
રાહુલના પપ્પા અને મમ્મી સાથે આવ્યા હતા. રેશ્માના, મમ્મી અને પપ્પા સહુને મળી પ્રભાવિત થયા. બધા સાથે ટેબલ પર ગોઠવાયા હતા. ગરમા ગરમ નાસ્તો આવી રહ્યો હતો. રેશ્મા સહુને આપવા ઉઠી. આદત પ્રમાણે ડાબા હાથે પિરસતી હતી. રેશ્માના મમ્મી બોલ્યા, ‘બેટા, ડાબા હાથે ન પિરસાય”!
રાહુલના મમ્મી બોલી ઉઠ્યા, ‘મને રેશ્મા એટલે તો ખૂબ ગમે છે, તે પણ મારી જેમ ડાબોડી છે ‘.
‘તમને કેવી રીતે ખબર’ ?
‘રેશ્મા તો અમારે ત્યાં છેલ્લા છ મહિનાથી આવે છે. મને તેની ઘણી આદત ખબર છે’.
બોલ્યા પછી થયું કે ,’કાચુ કપાઈ ગયું ‘!
રેશ્માના મમ્મી, વાત ખૂબ સહજતાથી લીધી. મહેમાનોના ગયા પછી, રેશ્મા પોતાના રૂમની બહાર ન નિકળી.
ખબર હતી સવાર સુધીમાં મમ્મીનો ગુસ્સો ઉતરી જશે. ‘ ભાંડો ફૂટી ગયો હતો!
અરે ભાઈ ‘ડાબોડી હોય કે જમણોડી’, શું ફરક પડે છે ? ડાબોડી હોય તેનું જમણું મગજ ખૂબ કસાયેલું હોય . બધું સરખું જ છે ને . મૂકો ને પંચાત .
હું તો ડાબોડી નથી . તમે છો ?
