નંદલાલ, કાળુ અને ધર્મપુરના યુવાનો સોનાનો એક મોટો ભાગ લઈને ગુપ્ત રીતે ગામ તરફ ગયા, અને અનિરુદ્ધસિંહ રતન સાથે ગઢ શિવાંજલિ તરફ ગયો.
ગામમાં નંદલાલે રાતોરાત સોનું ગરીબોમાં વહેંચવાનું શરૂ કર્યું. જેના પર જયસિંહનું સૌથી વધુ કર હતું, તેના દરવાજા પર સોનાના સિક્કાની થેલીઓ મળતી. લોકોમાં ખુશી અને આશ્ચર્ય ફેલાઈ ગયું. બધા એક જ નામનો જાપ કરવા લાગ્યા: "ડકેત."
જયસિંહના મહેલમાં વાત પહોંચી. તે ગુસ્સાથી લાલચોળ થઈ ગયો.
કોણ છે આ ડકેત?
જે મારા નાક નીચેથી લૂંટ કરે છે અને મારા શાસનને પડકાર આપે છે? તેને પકડી લાવો, જીવતો કે મરેલો!
જયસિંહે પોતાના સૌથી ક્રૂર સેનાપતિ, સુમેરને આ કાર્ય સોંપ્યું.
સુમેરે જયસિંહના કિલ્લાની આસપાસ સુરક્ષા સખત કરી દીધી અને ગામમાં જાસૂસો ફેલાવી દીધા.
આ દરમિયાન, અનિરુદ્ધસિંહને મીરાં તરફથી ગંભીર સમાચાર મળ્યા.
મીરાં મહેલમાં કામ કરતી હતી, સફાઈના બહાને જયસિંહના ખંડની અંદર ગઈ હતી. તેણે જોયું કે જયસિંહ ગુપ્ત રીતે ભીમસિંહ સાથે હાથ મિલાવી રહ્યો છે.
"ડકેત," મીરાંએ કહ્યું, જયસિંહે ભીમસિંહને આદેશ આપ્યો છે કે તે સોનાની લૂંટનો બદલો લેવા માટે ધર્મપુર અને તેની આસપાસના ગામડાં પર હુમલો કરે, જેથી લોકો ડરી જાય અને ડકેતનું નામ ભૂલી જાય. તેના બદલામાં જયસિંહે ભીમસિંહને જંગલના રસ્તા પર લૂંટ કરવાની છૂટ આપી છે!
આ સાંભળીને અનિરુદ્ધસિંહના પગ નીચેથી જમીન સરકી ગઈ. ભીમસિંહ નંદલાલને લૂંટના બદલામાં નહીં, પણ જયસિંહના આદેશથી ધર્મપુર પર હુમલો કરવા જઈ રહ્યો હતો! નંદલાલનો જીવ અને તેનું આખું ગામ જોખમમાં હતું.
"રતન," અનિરુદ્ધસિંહે કહ્યું, આપણી યોજના બદલવી પડશે.
ભીમસિંહને હવે નંદલાલ જ નહીં, પણ આખું ધર્મપુર રોકશે. આપણે નંદલાલની મદદ કરવી પડશે, અને ભીમસિંહના હુમલાને કાયમ માટે રોકવો પડશે.
બીજી બાજુ સુમેરના જાસૂસું એ નંદલાલ ની માહિતી સુમેરને આપી દીધી સુમેરે નંદલાલ ને પકડવાની યોજના બનાવી.
આ જ સમયે, નંદલાલ ભીમસિંહના ગુપ્ત અડ્ડાની શોધમાં નીકળી ગયો હતો. તેને લાગતું હતું કે ડાકુઓના ત્રાસનો અંત લાવવાનો આ જ એકમાત્ર રસ્તો છે.
નંદલાલે કાળુ અને તેના દળને ધર્મપુરના રક્ષણ માટે તૈયાર રહેવાનો આદેશ આપ્યો, અને પોતે એકલો જંગલમાં ઊંડે સુધી જવાનું જોખમ ઉઠાવ્યું. તે તાંત્રિકની આપેલી કટાર પર સંપૂર્ણ વિશ્વાસ મૂકીને આગળ વધ્યો.
થોડા સમય પછી,
નંદલાલને જંગલમાં એક ગુપ્ત ગુફાનો પ્રવેશદ્વાર મળ્યો. તે ભીમસિંહનો અડ્ડો હતો. નંદલાલ ગુફામાં પ્રવેશી ગયો, જ્યાં ડાકુઓ દારૂ પીતા અને લૂંટનો સામાન વહેંચતા હતા.
પરંતુ તે ગુફામાં માત્ર ડાકુઓ નહોતા. ત્યાં ખૂંખાર સેનાપતિ સુમેર પણ હાજર હતો!
સુમેરે નંદલાલને પકડી પાડવા માટે જાણી જોઈને ભીમસિંહને લૂંટનો એક ભાગ આપ્યો હતો. સુમેર જાણતો હતો કે નંદલાલ ડાકુઓના બદલા માટે જરૂર આવશે.
જેવો નંદલાલ અંદર પ્રવેશ્યો, કે તરત જ સુમેરના સૈનિકોએ તેને ઘેરી લીધો.
વેપારી નંદલાલ, સુમેરે હસીને કહ્યું, "તારું કાળું કામ પૂરું. હવે તારો મિત્ર 'ડકેત' ક્યાં છે? તને પકડીને હું જયસિંહજીને ખુશ કરીશ, અને તારા મિત્રને ફસાવીને આખા ગઢ શિવાંજલિના ડરનો અંત લાવીશ."
નંદલાલ ફસાઈ ગયો હતો, તેની કટાર છીનવાઈ ગઈ હતી, અને ધર્મપુર પર હુમલો થવાનો હતો. તેને ખબર હતી કે હવે એક જ વ્યક્તિ તેને અને તેના ગામને બચાવી શકે છે:
એ છે 'ડકેત!'
નંદલાલ ભીમસિંહના અડ્ડામાં સુમેર અને ડાકુઓના હાથે પકડાઈ ગયો. તેના હાથ બાંધી દેવામાં આવ્યા અને તેને ભીમસિંહની સામે જમીન પર બેસાડવામાં આવ્યો.
આ તે જ વેપારી છે, સરદાર! એક ડાકુએ કહ્યું. આના જ કારણે આપણી ઈજ્જત અને લૂંટ બંને ગઈ!
ભીમસિંહે ક્રૂરતાથી હસીને નંદલાલ તરફ જોયું. વેપારી, તારું સાહસ ખતરનાક હતું. પણ તારા લીધે મારા ડાકુઓ અને જયસિંહના સિપાહીઓ વચ્ચે યુદ્ધ થયું. હવે હું તારી આંખો સામે તારા ગામ ધર્મપુરને લૂંટીશ.
નંદલાલની આંખોમાં ગુસ્સો અને નિરાશા હતી. ભીમસિંહ, તું જયસિંહના હાથની કઠપૂતળી બની ગયો છે. તું ડાકુ નથી, તું ગુલામ છે!
સુમેરને આ સાંભળીને ગુસ્સો આવ્યો.
બસ! આ વેપારીની જીભ કાપી નાખો! ભીમસિંહ, આપણે ધર્મપુર પર હુમલો કરીએ તે પહેલાં આને મોત આપીને ડકેતને પકડવા માટે એક જાળ બિછાવીએ.
સુમેરની યોજના હતી કે તે નંદલાલને ગામના ચોકમાં ફાંસી આપવાની જાહેરાત કરશે, જેથી 'ડકેત' તેને બચાવવા માટે બહાર આવે.
બીજી તરફ, અનિરુદ્ધસિંહ ('ડકેત')ને મીરાં તરફથી નંદલાલના જોખમ વિશે જાણ થઈ ગઈ હતી.
રતન! આપણે નંદલાલને બચાવવો પડશે. તેના વિના આપણે ભીમસિંહ અને જયસિંહ બંને સામે લડી નહીં શકીએ. નંદલાલ માત્ર આપણો સાથી નથી, તે આપણા સંકલ્પની શક્તિ છે.
અનિરુદ્ધસિંહે ઝડપથી યોજના બનાવી. તે ધર્મપુરના લોકોને લડવા માટે તૈયાર થવાનો સંકેત આપશે, અને પછી પોતે નંદલાલને બચાવવા માટે એકલો જ જશે.
નંદલાલને બીજા દિવસે ધર્મપુરના ચોકમાં લાવવામાં આવ્યો. તેની ફાંસીનો માચડો તૈયાર કરવામાં આવ્યો હતો. સેંકડો ગામલોકો ડર અને શોકથી આ દ્રશ્ય જોઈ રહ્યા હતા. તેમના સૂરવીર વેપારીનો અંત આવી રહ્યો હતો.
અચાનક, લોકો વચ્ચેથી એક ઊંચો અને શક્તિશાળી વૃદ્ધ માણસ બહાર આવ્યો. તેના માથા પર રાખ ચોપડેલી હતી, અને તેના ચહેરા પર ગુસ્સો હતો.
તે વૃદ્ધ તાંત્રિક હતો!
અરે મૂર્ખાઓ! આ માણસને છોડી દો! તાંત્રિકે જોરદાર ગર્જના કરી, અને તેની આંખો લાલ થઈ ગઈ.
સુમેરે તાંત્રિકને ધમકાવ્યો. કોણ છે તું, પાગલ બ્રાહ્મણ? તું રાજકાર્યમાં હસ્તક્ષેપ કરી રહ્યો છે! દૂર થા!
તાંત્રિકે પોતાનો જમણો હાથ હવામાં ઊંચો કર્યો. તેના હાથમાં એક ધૂણીની રાખ હતી. તેણે તે રાખ સુમેર અને ભીમસિંહના માણસો પર ફેંકી.
જેમ જ રાખ સૈનિકો પર પડી, તેઓ દર્દથી ચીસો પાડવા લાગ્યા અને જમીન પર ઢળી પડ્યા. આ તાંત્રિકની જડીબુટ્ટીઓનું કોઈક શક્તિશાળી મિશ્રણ હતું.
"નંદલાલ," તાંત્રિકે કહ્યું, તારું વચન તૂટ્યું નથી. પણ તેં ઉતાવળ કરી. તારી કટાર અહીં છે, અને તારો જીવ પણ મારો છે. હવે ભાગ, અને તારું અધૂરું કાર્ય પૂરું કર!
આ અણધારી મદદથી નંદલાલના પગમાં તાકાત આવી. તેણે પોતાના બંધન તોડ્યા અને તાંત્રિકના હાથમાંથી પોતાની સિદ્ધ કટાર પાછી લીધી. આટલામાં જ, અનિરુદ્ધસિંહ ('ડકેત') પોતાના તીરકામઠા સાથે ચોકની ઉપરના એક ઝાડ પરથી નીચે કૂદી પડ્યો.
નંદલાલ અને અનિરુદ્ધસિંહ હવે બાજુમાં હતા. બે અલગ-અલગ યોદ્ધાઓ, એક વચનથી બંધાયેલો વેપારી અને બીજો રાજવી વારસદાર, એકસાથે પોતાના દુશ્મનો સામે ઊભા હતા.
સુમેર! ભીમસિંહ! અનિરુદ્ધસિંહે જોરદાર અવાજે પડકાર ફેંક્યો. તમારો સમય પૂરો થયો. હવે ડકેત અને વેપારીનો સંકલ્પ બંને મળીને તમારો અંત લાવશે!
તાંત્રિકે શાંતિથી નંદલાલને ઈશારો કર્યો અને અંધારામાં અદ્રશ્ય થઈ ગયો. હવે નંદલાલ અને અનિરુદ્ધસિંહ સામે સેનાપતિ સુમેર અને ડાકુ સરદાર ભીમસિંહનું સંયુક્ત દળ હતું.
આ યુદ્ધનું પરિણામ શું આવશે? શું નંદલાલ અને અનિરુદ્ધસિંહ પોતાના ગામને અને ગઢને મુક્ત કરાવી શકશે? અને સુમેર અને ભીમસિંહની ટોળકીનો અંત કેવી રીતે આવશે? ધર્મપુરના ચોક પર અંતિમ યુધ્ધ થશે? અનિરુદ્ધ સિંહ નો બદલો અને નંદલાલ નું વચન પુરું થશે? ગઢ શિવાંજલિના ભવિષ્યનો નિર્ણય શું આવશે ?
જાણવા માટે વાંચતા રહો ડકેત..
