સોદો, પ્રેમ, કે પ્રતિશોધ?
ભાગ ૭: ષડયંત્રની જાળ
રિયાની આંખો સામે અંધારું છવાઈ ગયું હતું. પ્રતાપ મહેતાના માણસોએ તેને બંગલાના ભોંયરામાં (Basement) લોખંડની ખુરશી સાથે બાંધી દીધી હતી. તેના માથામાંથી લોહી વહી રહ્યું હતું, પણ તેને પોતાની ચિંતા નહોતી, તેને ચિંતા હતી આર્યનની. આર્યન જેને પોતાનો ટેકો માની રહ્યો હતો, એ જ વ્યક્તિ તેના પિતાનો હત્યારો હતો.
પ્રતાપ મહેતા નીચે આવ્યો. તેના હાથમાં રિયાનો ફોન હતો, જે તેણે તોડી નાખ્યો હતો. "રિયા, તેં બહુ મોટું જોખમ લઈ લીધું. જો તેં શાંતિથી હાર માની લીધી હોત, તો કદાચ તું જીવતી બચી જાત. પણ હવે તારો ઉપયોગ હું આર્યનને ખતમ કરવા માટે કરીશ."
"તમે ક્યારેય સફળ નહીં થાઓ," રિયાએ નબળા અવાજે પણ મક્કમતાથી કહ્યું. "આર્યન તમને ઓળખી જશે."
"આર્યન?" પ્રતાપ અટ્ટહાસ્ય કરી ઉઠ્યો. "એ બિચારો અત્યારે નશામાં ધૂત છે. તેને લાગે છે કે દુનિયામાં તે એકલો છે. અને કાલે સવારે જ્યારે તે સહી કરશે, ત્યારે તે પણ તેના પિતાની જેમ 'આત્મહત્યા' કરી લેશે."
બીજી બાજુ, આર્યન બંગલાના હોલમાં બેઠો હતો. પ્રતાપે તેને કોઈ નશીલી દવા આપેલી ચા પીવડાવી દીધી હતી, જેના કારણે તેનું મગજ કામ નહોતું કરી રહ્યું. તેને સતત રિયાના પેલા વીડિયોના શબ્દો સંભળાતા હતા. પણ તેના મનનો એક ખૂણો કહી રહ્યો હતો કે રિયા આવી ના હોઈ શકે.
તેણે વિચાર્યું, 'રિયાનો ફોન કેમ બંધ આવે છે? જો તેને માત્ર પ્રોપર્ટી જોઈતી હોત, તો તે મને મનાવવાની કોશિશ કરત, પણ તે તો ચૂપચાપ જતી રહી.'
આર્યન ઉભો થયો અને રિયાના રૂમમાં ગયો. ત્યાં નીચે એક કાગળ પડ્યો હતો. એ રિયાએ લખેલી ડાયરીનું પાનું હતું. તેમાં લખ્યું હતું: "આર્યન, ભલે તમે મને નફરત કરો, પણ હું તમને વચન આપું છું કે તમારા પિતાને ન્યાય અપાવીને રહીશ. આકાશ અંકલની સાથે જે થયું તેમાં મારા પિતા કદાચ કાયર હતા, પણ ગુનેગાર કોઈ બીજું જ છે."
આર્યનને આંચકો લાગ્યો. આ પાનું રિયાએ તેને કાઢી મૂકી એ પહેલાં લખ્યું હતું. જો તે દગો આપવા માંગતી હોત, તો આવું શું કામ લખે?
ત્યાં જ પ્રતાપ અંદર આવ્યો. "દીકરા, હજુ સૂતો નથી? ચાલ, આ પેપર્સ પર સહી કરી દે. કાલે સવારે આપણે મીડિયાને કહીશું કે તું હવે બિઝનેસમાંથી રિટાયર થઈ રહ્યો છે અને બધું મને સોંપી રહ્યો છે."
આર્યને પ્રતાપની આંખોમાં જોયું. તેમાં એક અજીબ ચમક હતી, જે પ્રેમાળ કાકાની નહીં પણ એક શિકારીની હતી. આર્યને પેન પકડી, પણ તેણે સહી ના કરી.
"કાકા, રિયા ક્યાં છે?" આર્યને પૂછ્યું.
પ્રતાપ થોડો ગભરાયો પણ સંભાળી લીધું, "એ તો જતી રહી. કદાચ વિક્રમ પાસે ગઈ હશે."
"ખોટું!" આર્યન ઉભો થયો. "રિયાની કાર હજુ ગેટની બહાર જ ઉભી છે. જો તે જતી રહી હોય તો કાર લઈને જાત. તમે કંઈક છુપાવો છો."
પ્રતાપનો ચહેરો બદલાયો. તેણે ઈશારો કર્યો અને બે સશસ્ત્ર ગુંડાઓ અંદર આવ્યા. "આર્યન, મેં વિચાર્યું હતું કે તું તારા પિતાની જેમ સીધી રીતે સહી કરી દઈશ. પણ તું જીદ પર ઉતર્યો છે. હવે તારે સહી કરવી જ પડશે, કારણ કે તારી વહાલી રિયા મારા કબજામાં છે."
આર્યન સ્તબ્ધ થઈ ગયો. "તમે... તમે મારા પિતાના ભાઈ થઈને આવું કરી શકો?"
"ભાઈ?" પ્રતાપ ગરજ્યો. "આકાશ હંમેશા મારી આગળ રહ્યો. પિતાએ બધી પ્રોપર્ટી તેના નામે કરી કારણ કે હું 'લાયક' નહોતો. મેં તેને મરવા મજબૂર કર્યો, અને હવે તારો વારો છે. જો રિયાને જીવતી જોવા માંગતો હોય, તો સહી કર!"
આર્યનને અત્યારે પોતાની ભૂલ સમજાઈ. તેણે રિયા પર શંકા કરીને તેને મુસીબતમાં મૂકી હતી. પણ તે અત્યારે નબળો પડી શકે તેમ નહોતો. તેણે સહી કરી દીધી.
"આ લે પેપર્સ. હવે મને રિયા પાસે લઈ જા," આર્યને મક્કમતાથી કહ્યું.
પ્રતાપ હસ્યો, "ચોક્કસ. પણ તું ત્યાંથી પાછો નહીં આવે."
તેઓ ભોંયરામાં પહોંચ્યા. રિયાને બંધાયેલી જોઈને આર્યનનું દિલ ચીરાઈ ગયું. રિયાએ આર્યનને જોયો અને માથું હલાવીને ના પાડી, "આર્યન, સહી ના કરતા!"
"મેં કરી દીધી છે રિયા," આર્યને રિયાની નજીક જઈને ધીમેથી કહ્યું. પણ તેના અવાજમાં એક પ્લાન હતો.
પ્રતાપે પેપર્સ ચેક કર્યા અને જેવો તે બહાર જવા ગયો, આર્યને તેની પાસે રહેલા ગાર્ડ પર હુમલો કર્યો. આર્યન એક સારો ફાઇટર પણ હતો. તેણે ગાર્ડની બંદૂક છીનવી લીધી.
પણ પ્રતાપ હોશિયાર હતો. તેણે રિયાની ગરદન પર છરી મૂકી દીધી. "બંદૂક નીચે ફેંકી દે આર્યન, નહીં તો રિયાની છેલ્લી ક્ષણ હશે!"
આર્યન થંભી ગયો. તે પોતાની મિલકત ગુમાવી શકે તેમ હતો, પણ રિયાને નહીં. તેણે બંદૂક નીચે મૂકી દીધી.
"ખૂબ સરસ," પ્રતાપે કહ્યું. "હવે હું તમને બંનેને અહીં જ સળગાવી દઈશ, અને દુનિયાને લાગશે કે બે પ્રેમીઓએ આત્મહત્યા કરી લીધી."
તેણે પેટ્રોલ છાંટવાનું શરૂ કર્યું. પણ તે ભૂલી ગયો હતો કે રિયાના પિતા, હરેશભાઈ, જેમને તેણે બ્લેકમેલ કર્યા હતા, તેઓ આર્યન અને રિયાની પાછળ જ હતા.
ત્યાં જ પોલીસની સાયરન ગુંજી ઉઠી. હરેશભાઈએ પોલીસને લઈને બંગલા પર દરોડો પાડ્યો હતો. પ્રતાપ ગભરાઈ ગયો. તેણે પેટ્રોલ ફેંકીને ભાગવાની કોશિશ કરી, પણ આર્યને તેને પકડી લીધો અને એક જોરદાર પંચ માર્યો.
"આ મારા પિતા માટે!" આર્યને બીજો પંચ માર્યો. "અને આ રિયા માટે!"
પોલીસે પ્રતાપને પકડી લીધો. આર્યને દોડીને રિયાના બંધન ખોલ્યા. રિયા સીધી આર્યનને વળગી પડી.
"આઈ એમ સોરી રિયા... મેં તારા પર વિશ્વાસ ના કર્યો," આર્યન રડતો હતો.
રિયાએ તેના આંસુ લૂછ્યા, "હવે એ બધું ભૂલી જાવ આર્યન. આપણે આ ષડયંત્ર તોડી નાખ્યું છે."
પણ હજુ ખતરો ટળ્યો નહોતો. જેવો પોલીસ પ્રતાપને લઈ જતી હતી, પ્રતાપ હસ્યો અને બોલ્યો, "તમને લાગે છે કે રમત પૂરી થઈ ગઈ? આર્યન, જે પેપર્સ પર તેં સહી કરી છે, એ સહી તો તેં કરી, પણ પ્રોપર્ટી હવે મારી નથી... એ તો 'થર્ડ પાર્ટી' ની થઈ ગઈ છે. તારો બિઝનેસ તો ગયો!"
આર્યન અને રિયા એકબીજા સામે જોવા લાગ્યા. આ 'થર્ડ પાર્ટી' કોણ હતી?
#MansiDesaiShastriNiVartao
#માનસીદેસાઈશાસ્ત્રીનીવાર્તાઓ
#Aneri
#SuspensethrillerStory
#Booklover
#Storylover
#Viralstory
