*ચહેરો કહે જ છે*
પૂછો નહીં કે કેમ છે? ચહેરો કહે જ છે;
પૂછો નહીં કે પ્રેમ છે? ચહેરો કહે જ છે.
સાચું હશે કે નહીં ભલા? પૂછો નહીં તમે;
તમને ય શેનો વહેમ છે? ચહેરો કહે જ છે.
એની હકીકતમાં જ એ સાચી હશે ખરી?
વાતાનુકૂલિત નેમ છે? ચહેરો કહે જ છે.
એના વિચારો જેમ એ છોડી શકે નહીં;
શ્વાસો ય એની જેમ છે? ચહેરો કહે જ છે.
છૂપું નથી હોતું અહીં ઈશ્વરનું કામ પણ;
એની ય કેવી રહેમ છે? ચહેરો કહે જ છે.
રમ્યા કરોને છો તમે અહીંયા સફાઈથી;
આ જિંદગી કે ગેમ છે? ચહેરો કહે જ છે.
#ડૉ_મુકેશ_જોષી
