"એક નાનકડું છમકલું" માં આજે..
શીર્ષક:- લગ્નના ૨૫ વર્ષ પછી...
ચાલ, કોઈ નવી દુનિયામાં જઈએ...
કંઈક દૂર સુધી જો સાથ તારો મળે,
તો ચાલ કોઈ નવી દુનિયામાં જઈએ.
ભૂલભુલૈયા જેવા નીરસ જીવનમાંથી,
ખોવાયેલા પ્રેમને ફરી ઝંઝોળીએ.
જિંદગી વીતી ગઈ રોજના કામકાજમાં,
ચાલ પ્રિયે, કોઈ નવી દુનિયામાં જઈએ.
એકલદોકલ હાસ્યના ઝરણાંને,
અટહાસ્યની નદીમાં આજે ફેરવીએ.
દિવસ-રાતના કાળચક્રને,
આજે ઘડીક રોકી દઈએ.
સમય કાઢી પ્રેમ નામનું
ખાબોચિયું તો ફરી ગોતીએ.
કા... કા... કરતા કાગડાને ભૂલી,
કોયલનો કલરવ સાંભળીએ.
ચાલ પ્રિયે...
કોઈ નવી દુનિયામાં જઈએ.
સમુદ્રની ભીની રેતીમાં,
તારું-મારું નામ લખીએ.
પહાડોની મહેફિલમાં,
તારા-મારા નામના પડઘા સાંભળીએ.
શબ્દોના તીરથી,
એકબીજાનું હૃદય તો કોતરીએ.
ચાલ પ્રિયે...
કોઈ નવી દુનિયામાં જઈએ.
જીવનમાં આને, તેને, બધાને,
સમય તો ઘણો ફાળવ્યો.
હવે થોડો સમય,
પોતાને પણ આપીએ.
પ્રેમ નામના થીજી ગયેલા શબ્દમાં,
ફરી જીવનની અગ્નિ પ્રગટાવીએ.
ચહેરા પર ઓઢેલા
સાંસારિક મુખોટા તો ઉતારીએ.
પ્રણય નામના જૂના શબ્દોને,
આજે ફરી વાગોળીએ.
વર્ષો વીતી ગયા,
પલક ઝપકાવ્યા વિના તને જોતાં.
ચાલ આજે,
આંખોમાં આંખો પરોવી,
એકબીજાનું પ્રતિબિંબ તો જોઈએ.
ઢળતી જતી જિંદગીનો
હવે શું ભરોસો કરવો?
આજે પૃથ્વી પર સૂઈએ તો,
કાલે કદાચ વૈકુંઠમાં સવાર થાશે,
ચાલ...
ઘડીક એકાંતમાં જઈ,
યાદોના હિંડોળા ઝુલાવીએ.
છેલ્લો શ્વાસ આવે, તે પહેલાં...
એકવાર ફરી,
પ્રેમનો આસ્વાદ માણીએ.
કંઈક દૂર સુધી જો સાથ તારો મળે,
તો ચાલ...
કોઈ નવી દુનિયામાં જઈએ.
✍️ જિગર અશોક પંડ્યા
