ఆకాశంలో పిడుగుల హోరు మెల్లగా తగ్గినా, ఆ గదిలో నెలకొన్న నిశ్శబ్దం అంతకంటే భయంకరంగా ఉంది. మేనార్ కోట గోడలు ఇంకా వణుకుతున్నట్టే ఉన్నాయి.
గురుస్వామి అన్న మాటలు వేద చెవుల్లో పదే పదే ప్రతిధ్వనిస్తున్నాయి. "నువ్వు ఈ ప్రపంచం అంతానికి కారణం అవుతావు!" అన్న హెచ్చరిక ఆమెను నిలువునా దహించివేస్తోంది.
అప్పటివరకు ఆశ్చర్యంలో మునిగిపోయిన అర్జున్, ఒక్కసారిగా తేరుకున్నాడు. అతని ముఖంలో భయం కంటే ఎక్కువ అవిశ్వాసం కనిపిస్తోంది.
తన చేతిలోని డైరీని గట్టిగా పట్టుకుని, గురుస్వామి వైపు ఒక అడుగు ముందుకు వేశాడు.
"అసలు మీరు ఏం మాట్లాడుతున్నారు స్వామీ? ఆధునిక యుగంలో ఉండి కూడా మమ్మల్ని ఇలాంటి వింత కథలు నమ్మమంటారా?" అని నవ్వుతూ అన్నాడు అర్జున్.
అతని నవ్వులో వెటకారం కంటే, తన లాజిక్కు దొరకని నిజాన్ని అంగీకరించలేకపోతున్న ఆవేదన కనిపిస్తోంది.
"రక్తం అంటే హిమోగ్లోబిన్, ఐరన్, ప్లాస్మా.. అంతేకానీ అందులో ఏవో పురాణ కాలపు జ్వాలలు ఉండటం ఏంటి? ఇదంతా కేవలం వినడానికి బాగుంటాయి. వేద భయపడి ఉండొచ్చు, కానీ దానికి ఏదో ఒక మెడికల్ కారణం ఉంటుంది. దాన్ని ఇలా దైవత్వంతో ముడిపెడితే ఎలా స్వామీ!" అని తనకు తోచినదాన్ని బయట పెట్టాడు అర్జున్.
అర్జున్ మాటలకు గురుస్వామి ఏమాత్రం చలించలేదు. ఆయన కళ్లలో ఒక రకమైన జాలి మెరిసింది. వేద మాత్రం మౌనంగా తన చేతులను చూసుకుంటోంది.
ఇందాక తన నరాల్లో ప్రవహించిన ఆ వేడి, ఆ నీలిరంగు మెరుపు.. అది హిమోగ్లోబిన్ వల్ల కలిగింది కాదని ఆమె అంతరాత్మ ఘోషిస్తోంది.
"మనిషి యొక్క తర్కం ఎక్కడ ముగుస్తుందో, అక్కడే తన నమ్మకం మొదలవుతుంది నాయనా.." అని గురుస్వామి గంభీరంగా అన్నారు.
ఆయన తన వెనక ఉన్న ఒక భారీ రాతి గోడ దగ్గరకు వెళ్లారు. అక్కడ పాతబడిన, మాసిన చర్మంపై గీసిన ఒక మ్యాప్ ఉంది. అది ప్రపంచ పటంలా ఉంది, కానీ అందులో వింతైన గుర్తులు ఉన్నాయి.
"చూడండి.." అని ఆయన ఆ మ్యాప్పై ఉన్న ఏడు ప్రాంతాలను చూపించారు.
"శరభేశ్వరుడు నరసింహుని ఆగ్రహాన్ని ఏడు భాగాలుగా విభజించి, ఏడు రహస్య బంధనాల వెనుక దాచాడు. ఈ ఏడు ముద్రలు లోకాన్ని రక్షిస్తున్నాయి. అందులో మొదటిది రక్త బంధనం. అది మరెక్కడో లేదు.. మనం నిలబడిన ఈ మేనార్ అడుగునే ఉంది. ఈ నేల లోపల యుగాల నాటి క్రోధాగ్ని బంధించబడి ఉంది. దానికి కాపలాదారులు వేద వంశస్థులు. అందుకే ఆమె రక్తం ఈ ముద్రతో అనుసంధానమై ఉంది."
అని ఆ చోటు యొక్క ప్రత్యేకతను మరియు అక్కడికి వచ్చిన వేద రక్తంలో జరిగిన మార్పుకు కారణం వివరించాడు గురుస్వామి.
అది విన్న వేద కళ్లు భయంతో పెద్దవయ్యాయి. "అంటే ఈ కోటనే ఒక అగ్నిపర్వతం మీద ఉందా? నాకు తెలియకుండానే నేను ఇంత పెద్ద ప్రమాదానికి కాపలా కాస్తున్నానా? లేదు, నావల్ల కాదు.. నేను ఈ బాధ్యతను మోయలేను స్వామీ!" అని ఆమె గొంతు వణికింది.
వెంటనే అర్జున్ కూడా ఇంకా ఏదో వాదించబోతుండగా, గురుస్వామి అతని దగ్గరకు వచ్చి ఆగిపోయారు.
"నీ తండ్రి కూడా సరిగ్గా నీలాగే వాదించేవాడు అర్జున్.." అని ఆయన అన్న మాటలకు అర్జున్ ఒక్కసారిగా నిశ్శబ్దమయ్యాడు. అతని గుండె వేగం పెరిగింది.
"ఏంటీ, నా.. నా.. మా నాన్న గురించి మీకు తెలుసా..? ఆయన ఇక్కడికి వచ్చారా?" అని అడిగాడు అర్జున్, తడబడుతున్న స్వరంతో.
"అవును అర్జున్.. నీ చేతిలో ఉన్న డైరీలోని చివరి పేజీ ఎందుకు ఖాళీగా ఉందో నీకు తెలుసా? ఆయన ఇక్కడికి వచ్చాడు.. ఈ బంధనాన్ని స్వయంగా చూశాడు. కళ్లతో చూసిన నిజాన్ని డైరీలో అక్షరబద్ధం చేయలేకపోయాడు. ఆయన మరణం వెనుక ఉన్న రహస్యం, ఈ మేనార్ అడుగున ఉన్న బంధనంతోనే ముడిపడి ఉంది." అని అన్నాడు గురుస్వామి.
గురుస్వామి మాటలు అర్జున్ తల మీద బండరాయితో కొట్టినట్టు అనిపించాయి. తన తండ్రి వెతికిన రహస్యాలు, ఈ వింత శక్తులు.. అన్నీ నిజమేనా? అని అనుకున్నాడు అర్జున్.
కొద్దిసేపటి తర్వాత, వేద మేనార్ ఆవరణలోని ఒక బాల్కనీలోకి వచ్చి నిలబడింది.
బయట కటిక చీకటి.. అప్పుడప్పుడు మెరుస్తున్న మెరుపులు ఆ అడవిని భయంకరంగా చూపిస్తున్నాయి. గురుస్వామి ఆమె పక్కనే వచ్చి నిలబడ్డారు.
వేద ఆకాశం వైపు శూన్యంగా చూస్తూ, "స్వామీ.. ఒకవేళ ఈ బంధనాలు విచ్ఛిన్నమైతే ఏమవుతుంది?" అని అడిగింది.
"లోకం అగ్నిగుండం అవుతుంది వేద. మనుషుల మధ్య ద్వేషం, కోపం కట్టలు తెంచుకుంటాయి. ఆ ఉగ్రతను ఆపే శక్తి కేవలం నీ రక్తానికి మాత్రమే ఉంది. నువ్వు కేవలం ఒక అమ్మాయివి కాదు.. ఈ లోకానికి కవచానివి. నీలోని ఆ క్రోధాన్ని నువ్వు అదుపు చేయడం నేర్చుకోకపోతే, అది నిన్ను మింగేయడమే కాకుండా, ఈ ప్రపంచాన్నే దహించివేస్తుంది." అని వేద ప్రశ్నకు బదులిచ్చాడు గురుస్వామి.
అది విన్న వేద తన గుండె మీద చేయి వేసుకుని, తన చిన్న కోపానికే తను వణికిపోతుంటే, ఇంతటి విశ్వరూపాన్ని తాను ఎలా అదుపు చేయగలదు? అని తనను తానే ప్రశ్నించుకుంది.
ముగ్గురూ తిరిగి లోపలికి వచ్చి ఆ రాతి గోడపై ఉన్న మ్యాప్ను గమనించసాగారు.
అర్జున్ తన తండ్రి డైరీలోని పేజీలను ఆ మ్యాప్తో పోల్చి చూస్తున్నాడు. ఎక్కడికక్కడ సరిపోలుతున్నాయి. అది చూస్తుంటే అతనిలో ఉన్న తర్కం మెల్లగా మరణిస్తోంది.
హఠాత్తుగా, ఆ గదిలో ఉన్న ఉష్ణోగ్రత పెరిగిపోయింది. వేద మెడలోని శరభ ముద్ర తీవ్రంగా కంపించడం మొదలైంది.
దాని నుండి ఒక నీలిరంగు కాంతి వెలువడి, గోడ మీద ఉన్న మ్యాప్పై పడింది. సరిగ్గా మేనార్ సూచించబడిన చోట, ఆ మ్యాప్లో ఒక ఎర్రని వెలుగు మైనపు దీపంలా వెలిగింది.
అది మెల్లమెల్లగా చిక్కని రక్త వర్ణంలోకి మారి మెరుస్తోంది. ఆ దృశ్యాన్ని చూసిన గురుస్వామి ముఖం పాలిపోయింది. ఆయన కళ్లలో ముందెన్నడూ లేని వణుకు కనిపించింది.
"అనర్థం జరిగిపోయింది..!" అని ఆయన అరిచారు.
"ఏమైంది స్వామీ?" అని అర్జున్, వేద ఆందోళనగా అడిగారు.
"మొదటి బంధనం ప్రమాదంలో పడింది.. దాన్ని ఛేదించడానికి శత్రువు గుమ్మం దగ్గరికి వచ్చేశాడు!" అని అన్నారు గురుస్వామి.
ఆయన మాట పూర్తి కాకముందే.. మేనార్ ప్రధాన ద్వారం ఎవరో బలంగా బాదిన శబ్దం వినిపించింది.
ఢామ్.. ఢామ్.. మంటూ ఆ భారీ ఇనుప తలుపులు విరిగిపోతాయేమో అన్నంత వేగంగా ఎవరో కొడుతున్నారు. ఆ శబ్దానికి కోట మొత్తం కంపించిపోతోంది.
గురుస్వామి వేద చేయి గట్టిగా పట్టుకుని, "వేద, ఈ మొదటి బంధనాన్ని ఎవరో కనుగొని దాడి చేస్తున్నారు. యుద్ధం మొదలైంది.. నీ లోపల ఉన్న శక్తిని మేల్కొలుపు..!" అని గర్జించారు.
బయట ఉన్నది ఎవరు? ఆ బంధనాన్ని కాపాడటానికి వేద సిద్ధంగా ఉందా?
మేనార్ తలుపులు దాటి లోపలికి ప్రవేశించిన ఆ భయంకర శక్తి ఏమిటి? అర్జున్ తన తండ్రి డైరీలోని రహస్యంతో వేదను ఎలా కాపాడతాడు?
