The Download Link has been successfully sent to your Mobile Number. Please Download the App.
Continue log in with
By clicking Log In, you agree to Matrubharti "Terms of Use" and "Privacy Policy"
Verification
Download App
Get a link to download app
બ્રહ્માએ હાથ ધોયા હશે, સર્જન કરીને નારીનું. એના જેવા ના જોયા હશે, સર્જન કરીને નારીનું. ના બની શકયું કોઈ કે જે એનું સ્થાન લઈ શકે, ભારોભાર ત્યાગ ભર્યા હશે, સર્જન કરીને નારીનું. રૂપની સાથે સેવા,સમર્પણને સહનશીલતા દીધાં, ધરાને કોઈ સૌગાત ધર્યા હશે, સર્જન કરીને નારીનું. સ્નેહ, સૌંદર્યને લાગણી રગેરગે વણી દીધા પછી, ગુણ માતૃત્વના એણે ગાયા હશે, સર્જન કરીને નારીનું. અનેકરુપધારી વ્યક્તિ સમય સમય પર દેખાતું ને, કીધી પરોપકારી એની કાયા હશે, સર્જન કરીને નારીનું. - ચૈતન્ય જોષી 'દિપક' પોરબંદર.
પ્રકૃતિને મળવાને આવ્યા અમે સાગર કિનારે. તરંગો નિહાળવાને આવ્યા અમે સાગર કિનારે. સામ્રાજ્ય રજનીનું ને સાગર શાંત બની ટહેલે , ઉતંગરવ સાંભળવાને આવ્યા અમે સાગર કિનારે. દીસે છે નાવ ક્યાંક ક્યાંક સમંદર શોભા વનારી, પ્રફુલ્લતા પામવાને આવ્યા અમે સાગર કિનારે. હરખે હૈયું નિસર્ગને નિહાળીને નિજ નયનને સહજ, ઉરધબકારે સાંકળવાને આવ્યા અમે સાગર કિનારે. દેવ વરુણ રખેને શાંતિ સુત્રો ભણી રહ્યા હોય ને, મનને મહેકાવવાને આવ્યા અમે સાગર કિનારે. ચૈતન્ય જોષી 'દિપક 'પોરબંદર.
મારી તમારાથી કોઈ ઓળખાણ નથી. તોય તમે મારાથી સાવ અજાણ નથી. આપણી યારી અરસપરસની અખંડ, છતાં એની આપણને કોઈ જાણ નથી. તરવો છે સમંદર છોને ઉતંગ અકળાવે, જાતમહેનતથી બાકી કોઈ વહાણ નથી. ભરાઈ એટલી ભરી છે બુદ્ધિ માનવમાં, આપવામાં રાખી કોઈ એણે તાણ નથી. ભાઈબંધીની આશાએ ભેળા કીધા એણે, અહીં કરવાનું કોઈએ કદી રમખાણ નથી. -ચૈતન્ય જોષી. " દીપક" પોરબંદર.
શિવદરશનની લગની લાગી મને. શિવચરણમાં થયો અનુરાગી. શિવકૃપાથી ભક્તિ મળે જો, સુકૃત ભવોભવનાં ફળે જો. અંતરે ઝંખના શિવની જાગી...1. નાથ દયાનિધિ દયા કરો હવે, સમય મારો છે ખરેખરો હવે રોમેરોમ મારું દરશન માગી...2 નાથ ભોળા નયન જોને તરસે, સન્મુખ આવોને નયન વરસે. ઉરની આરત અદભુત લાગી...3 દેવ દિલાવર એટલું આપો, અંતરે સ્મરણ શિવનું સ્થાપો. આશાને તૃષ્ણા જાય હવે ભાગી..4 - ચૈતન્ય જોષી. " દીપક " પોરબંદર.
શબ્દોને સજાવ્યા કરો ક્યારેક ક્યારેક. અર્થોને ઘટાવ્યા કરો ક્યારેક ક્યારેક. રોજરોજ નિતનવી સમસ્યા આવવાની, તોય મુસ્કુરાયા કરો ક્યારેક ક્યારેક. સપનાની દુનિયા બને યા ન પણ બને, છતાંયે ધૈર્ય ધર્યા કરો ક્યારેક ક્યારેક. હરપળ હોય હરિ હારે એ ના ભૂલાય, કર્મપથ પર ધપ્યા કરો ક્યારેક ક્યારેક. બગાસું ખાતાં પતાસું મુખે ના આવે તો, મંજિલ લગી ડગ ભર્યા કરો ક્યારેક ક્યારેક. - ચૈતન્ય જોષી. " દીપક " પોરબંદર
કાનુડા ભરી લેને પિચકારી તો આજે હોળી મનાવીએ જો તું એવું કૈં શકે વિચારી તો આજે હોળી મનાવીએ તેં પણ મનાવી હશે અતીતે હોળી ગોપબાળોની સંગે, જો રમવાની હોય તૈયારી તો આજે હોળી મનાવીએ રંગ કેસૂડાના ઘોળીઘોળી તૈયાર કીધા છે વહાલમ મેં, ને જોતાં રહે નરને નારી તો આજે હોળી મનાવીએ. રંગ લગાવીને માખણ પણ ખવડાવીશ હોને કહાના, ઊભય ઉરઅગન દે ઠારી તો આજે હોળી મનાવીએ છોને અંશઅંશી થૈને બિનધાસ્ત આજે હોળી ખેલતા, લાલા તારા પર જાઉં વારી તો આજે હોળી મનાવીએ - ચૈતન્ય જોષી. " દીપક " પોરબંદર.
શાંતિને ધીરજ રાખીને પરીક્ષા આપવી ઘટે. મનોબળ મજબૂત ધરીને પરીક્ષા આપવી ઘટે. વાંચેલુંને લખેલું પૂર્વે એ વાગોળવાનો વખત, માનવસહજ કર્મ કરીને પરીક્ષા આપવી ઘટે. પરિણામની ચિંતા કે ચિંતનનો સમય નથી કે, યાદદાસ્તને ફરી ઢંઢોળીને પરીક્ષા આપવી ઘટે. અઘરું કે સહેલું એ પળોજણમાં પડ્યા વગર, સહેલું તે જે વહેલું લખીને પરીક્ષા આપવી ઘટે. બનીને પાર્થ થૈ નિશ્ચિંત તમારું કર્મ કર્યે જાઓ, કૃષ્ણને બસ સાક્ષી ગણીને પરીક્ષા આપવી ઘટે. - ચૈતન્ય જોષી. " દીપક " પોરબંદર.
શિયાળાને વિદાય આપી આવી હુતાશણી. ઉનાળાને રખે આવકારી આવી હુતાશણી. યાદ પ્રહલાદની આજેય સ્મરણમાં આવતી, હિરણ્યકશિપુને ધિક્કારી આવી હુતાશણી. અગનકસોટી છોને થતી હોય હરિ જો હારે, ભક્તવત્સલતાને સ્વીકારી આવી હુતાશણી. હોલિકાદહને સહીસલામત રહ્યો પ્રહલાદને, સત્યનો શકે વિજય મનાવી આવી હુતાશણી. કેસૂડાંના રંગે માનવમહેરામણ તો ગયું રંગાઈને, નૂતન જોમને ઉત્સાહ સંચારી આવી હુતાશણી. - ચૈતન્ય જોષી. " દીપક " પોરબંદર.
આવ્યો તહેવાર હોળીનો, હરિના રંગે રંગાઈ જઈએ. ના રહે પછી કશુંએ બાકી, આપણે હરિ જેવા થઈએ. રંગ દુનિયાનો દુઃખ આપનારો,એને હવે ત્યજી દઈએ, હરિસંગાથે કરીએ ગોઠડી, એની વધુ નજદીક હોઈએ ઊર્જા ભરી લઈને નિતનવી, હરિ આશ્રિત સૌ છીએ, ફાગ હોળીના મેલી એકકોરને ગીત ગોવિંદનું ગાઈએ. રંગલાખવત્ મિલન હો પછી, હરિના વિચારે વહીએ, એક જ રંગ હશે ઊભયનોને, ઈતિહાસ એ સરજીએ. હરિભક્તો હોય હારડા સમા ગરદનમાંહે આરોપીએ, અંતરથી અંતર જાય ઘટતુંને દૂરી હરિથી હટાવીએ. - ચૈતન્ય જોષી. " દીપક " પોરબંદર.
શૃંગગર્તના પાટા ઉપર સતત સરકતી જાય જિંદગી. ક્યારેક હસતી તો ક્યારેક રૂદન કરતી જાય જિંદગી. ખબર ન પડે કેમ વીતી જાય સમો હાથમાંથી સહુના, ક્યારેક હરખ તો ક્યારેક પસ્તાવો ધરી જાય જિંદગી. આંખના પલકારે વીતતો સમય ના પકડાય કદી પણ, એક આંખે હસાવી બીજી આંખે રડાવી જાય જિંદગી અનુકૂલની અદા હોય જો હસ્તગત તો તમારો છે એ, બાકી કેટલા મૂક સંદેશા સૌને શિખવી જાય જિંદગી. નથી કોઈનેય સમજાઈ આજદિન લગી મન્મથગતિ, ને ભરવસંતે બનીને પાનખર કેવી ખરી જાય જિંદગી. - ચૈતન્ય જોષી. " દીપક " પોરબંદર.
Copyright © 2026, Matrubharti Technologies Pvt. Ltd. All Rights Reserved.
Please enable javascript on your browser
