" શબ્દની સાહિત્યયાત્રા "
અહીં અક્ષર તણા શણગાર લઈને ચાલ્યા છીએ.
કલમના કસબી સંગ સંસ્કાર લઈને ચાલ્યા છીએ.
અનુભૂતિ, અદબ ને ભાવનો સંગમ રાખીને કાયમ,
અમે તો શબ્દ તણો રણકાર લઈને ચાલ્યા છીએ.
પરસ્પર સ્નેહથી જોડાયેલો છે આપણો પરિવાર,
હર હૃદયમાં પ્રેમ કેરો સત્કાર લઈને ચાલ્યા છીએ.
ગૂંથાયા છીએ એકબીજાથી જ લાગણીના તાંતણે,
દૂરથી પણ દરેકનો સાક્ષાત્કાર લઈને ચાલ્યા છીએ.
વિચારોની સજાવી રાખી પાલખી આ જ્ઞાનના પંથે,
સાહિત્યનો અનોખો ભણકાર લઈને ચાલ્યા છીએ.
મળશે મોક્ષ અક્ષરના આ પરમ તત્ત્વમાં જ ‘વ્યોમ’,
શબ્દોની ભક્તિ તણો આધાર લઈને ચાલ્યા છીએ.
✍...© વિનોદ. મો. સોલંકી "વ્યોમ"
જેટકો (જીઈબી) અંજાર. મુ. રાપર.
